انا امبارح لفيت علي كذا جامعه عشان اللي ناوي يقدم .. هقولكم عن اللي شفته في اربع جامعات خاصه
- اولا مافيش حاجه اسمها early admission .. ده سرقه ونصب .. كده كده مابينفعش يقبلوا ورق ولا يحجزوا مكان الا بعد نتيجه الثانويه العامه .. ده مش اكتر من ان الطالب بيعمل الامتحان وانتي تسألي علي كل المعلومات والدنيا فاضيه ومافيش ناس كتير.. كده كده مافيش مكان بيتحجز والكلام اللطيف ده .. يعني لو نجح الطالب فالامتحان ودفعتي المصاريف وجه حد مجموعه اكبر من مجموع ابنك بدرجتين هياخدوه مكانه ومالكيش حق تعترضي بس بتسحبي فلوس الجامعه كامله بدون فلوس الامتحان .. وده كلام من بوء اللي قابلتهم انهارده في ٣ جامعات .
- كل فلوس الامتحان لاترد في كل الجامعات وكلها ٥٠٠ جنيه .
- المصاريف اللي هكتبها دي بتاعت السنه اللي احنا فيها انما تقديم ٢٠١٧ ( اكيد مصاريفه هتزيد )
الجامعات اللي رحتها دي وجهه نظري انا الشخصيه فيهم من الاحساس العام بالمكان والتعاون والتنظيم .
Future university
فيها كليات ( صيدله . اسنان . اقتصاد وعلوم سياسيه . علوم كمبيوتر. هندسه . اعلام وبزنيس )
بتدي شهادتين واحده من الفيوتشر وواحده من جامعه cincinnati university USA
الامتحانات لسه مابدأتش .. الولاد بيمتحنوا في english وال Computers .للطالب الحق بعد سنه تانيه انه يروح يكمل دراسه فالجامعه دي في امريكا .
الاسكور من ٧٠٪ لكل الكليات العاديه ( مش الطبيه وهندسه ) والهندسه ٨٠٪
الكليه كبيره ومنظمه ومتعاونين جداااااا والطلبه شكلهم لطيف ومحترم ومش اوڤر .. في عدد كبير من الدكاتره اجانب .
المصاريف ٣٠ الف + ١٣٠٠$ للcomputers
٤٣ الف +١٣٠٠$ للهندسه
مكانها اخر شارع التسعين فالتجمع الخامس من سنه ٢٠٠٦
- Guc الجامعه الالمانيه
- التقديم اون لاين وبتحدد معاد وبيمتحن فالجامعه .
- مش بيقولوا الاسعار بتاعه السنه الجايه لانها هتزيد .. السنه دي كانت اعلي حاجه فالهندسه تقريبا ٦٢ الف للترم الواحد
- الجامعه انا مارتحتلهاش اوڤر في كل حاجه والبنات ماشيه بالسجاير عادي جوه الجامعه والناس مش متعاونين خااالص وبيتكلموا بمنتهي التناكه من منطلق ان احنا مش محتاجين احنا عندنا بزياده طلبه .. الموظف اللي كان بيكلمني مجعوص وماتعدلش طول القعده معاه وبيكلمني بمنتهي القرف فعلا ومش متحمس يديكي اي معلومه ولا بيشجعك حتي تكملي الحوار .
- الاسكور هما بياخدوا اعلي اسكور للطلبه في كل تخصص لحد ما يكتفوا بالعدد من كل الشهادات .
- Bue الجامعه البريطانيه
- التقديم اون لاين ولو الطالب امريكن وجايب فوق ال١٣٠٠ مالوش امتحان
- التقديم للامتحان من اول يناير
- فيها بيزنس . هندسه . اعلام. كمبيوتر . طب اسنان . صيدله. تمريض . حقوق
- الطالب بياخد شهادتين من الجامعه ومن london south bank university .. ماعدا الكليات الطبيه مش بياخدوا الشهاده بتاعه انجلترا لان الطب في انجلترا ٨ سنين .
- الجامعه لطيفه كمبني وموقع الناس متعاونه وبشوشين واسعارها بالنسبه للكمبيوتر ٣٠ الف و٥٠٠٠ مصاريف اداريه و٥٠٠ استرليني والباص تقريبا للتجمع ٦٠٠٠
- Miu
- التقديم اون لاين وابتدوا يعملوا امتحانات من دلوقتي
- الجامعه بعيده وع الطريق السريع ( طريق اسماعيليه الصحراوي ) مش عارفه ليه حسيتها قالبه مدرسه بس الطلبه شكلهم محترم ومعظمهم كان قاعد بيذاكر شكلهم عندهم امتحانات😂
- الجامعه بتقبل كمبويتر من ٧٠٪ ومواد الGpa هي اللي بتحددها من اعلي مواد فال٣ سنين .
- المصاريف ٣٢ الف والباص ٧٠٠٠ج
- الجامعه بقالها ٢٠ سنه موثوق فيها وفي مستواها الاكاديمي
د
No comments:
Post a Comment
Note: Only a member of this blog may post a comment.